സമൂഹത്തോടും ജനങ്ങളോടും പ്രതിബദ്ധതയുള്ളവരായി തീരേണ്ടവരാണ് ജനപ്രതിനിധികളെന്ന് വരാപ്പുഴ ആർച്ച് ബിഷപ് ഡോ.ജോസഫ് കളത്തിപ്പറമ്പിൽ.


തദ്ദേശ സ്ഥാപനങ്ങളിലേക്ക് തിരഞ്ഞെടുക്കപ്പെട്ട വരാപ്പുഴ അതിരൂപത അംഗങ്ങളെ ആദരിക്കുന്നതിനായി സംഘടിപ്പിച്ച തദ്ദേശാദരം അനുമോദനസംഗമം ഉദ്ഘാടനം ചെയ്തു സംസാരിക്കുകയായിഅദ്ദേഹം. അതിരൂപതാംഗങ്ങളായ 130 ജനപ്രതിനിധികൾക്കും വരാപ്പുഴ അതിരൂപതയുടെ ഉപഹാരം ആർച്ച് ബിഷപ് സമ്മാനിച്ചു. എറണാകുളം ഇഎസ്എസ്എസ് ഓഡിറ്റോറിയത്തിൽ നടന്ന പരിപാടിയിൽ കെഎൽസിഎ വരാപ്പുഴ അതിരൂപത പ്രസിഡൻ്റ് സി.ജെ. പോൾ അധ്യക്ഷത വഹിച്ചു.

സമൂഹത്തിൽ നന്മയുടെ നക്ഷത്രങ്ങളായി മാറേണ്ടവരാണ് ജനപ്രതിനിധികളെന്ന് മുഖ്യ പ്രഭാഷണം നടത്തിയ കെആർഎൽസിസി വൈസ് പ്രസിഡൻ്റ് ഷാജി ജോർജ് അഭിപ്രായപ്പെട്ടു.

ആലുവ നഗരസഭ ചെയർമാൻ എം.ഒ.ജോൺ, എറണാകുളം ജില്ലാ പഞ്ചായത്തംഗം യേശുദാസ് പറപ്പിള്ളി, മരട് മുനിസിപ്പൽ ചെയർമാൻ ആൻ്റണി ആശാൻപറമ്പിൽ, കൊച്ചി കോർപറേഷൻ അംഗം അഡ്വ. മിനിമോൾ, വരാപ്പുഴ അതിരൂപത രാഷ്ട്രീയകാര്യ സമിതി ചെയർമാൻ മോൺ.ജോസഫ് പടിയാരംപറമ്പിൽ,കെഎൽസിഎ സംസ്ഥാന ജനറൽ സെക്രട്ടറി അഡ്വ.ഷെറി ജെ തോമസ്, കെഎൽസിഎ അതിരൂപത ഡയറക്ടർ ഫാ.മാർട്ടിൻ തൈപ്പറമ്പിൽ, റോയ് പാളയത്തിൽ, സിബി ജോയ്, എന്നിവർ പ്രസംഗിച്ചു.

അതിരൂപത ബിസിസി ഡയറക്ടർ ഫാ.ആൻറണി അറക്കൽ, ഇഎസ്എസ്എസ് ഡയറക്ടർ ഫാ.മാർട്ടിൻ അഴിക്കകത്ത്, കെഎൽസിഎ അസോ.ഡയറക്ടർ ഫാ.രാജൻ കിഴവന, കൊച്ചി കോർപറേഷൻ അംഗങ്ങളായ ഹെൻറി ഓസ്റ്റിൻ, ജോർജ് നാനാട്ട്, എന്നിവർ പ്രത്യേക ക്ഷണിതാക്കളായിരുന്നു.

വരാപ്പുഴ അതിരൂപതയുടെ സാമൂഹ്യ സേവന വിഭാഗമായ എറണാകുളം സോഷ്യല്‍ സര്‍വ്വീസ് സൊസൈറ്റി തദ്‌ദേശ സ്വയംഭരണ സ്ഥാപനങ്ങളിലേക്ക് നടന്ന തിരഞ്ഞെടുപ്പില്‍ ഇ.എസ്.എസ്.എസി ന്റെ സ്വയം സഹായ സംഘങ്ങള്‍, മറ്റു സമിതികള്‍ എന്നിവയില്‍ നിന്നും നിന്നും തിരഞ്ഞെടുക്കപ്പെട്ട 23 ജനപ്രതിനിധികളെ ആദരിച്ചു. ഇ.എസ്.എസ്.എസ്. ഓഡിറ്റോറിയത്തില്‍ വച്ച് നടത്തിയ അനുമോദന സമ്മേളനം ശ്രി.ഹൈബി ഈഡന്‍ ങജ ഉല്‍ഘാടനം ചെയ്തു. സാധാരണ ജനങ്ങളുടെ സ്വീകാര്യത നേടുവാന്‍ നിയമ നിര്‍മ്മാണ പ്രവര്‍ത്തനങ്ങളില്‍ പങ്കാളിയാവുക എന്നതിനപ്പുറം സാമൂഹ്യപരമായ ഉത്തരവാദിത്വങ്ങള്‍ ഏറ്റെടുക്കുന്നതും ജനങ്ങളുടെ സുഖങ്ങളിലും, ദുഖങ്ങളിലും പങ്കുചേരുന്നതും ഒരു ജനപ്രതിനിധിയുടെ കടമയാണെന്ന് അദ്‌ദേഹം ഓര്‍മ്മപ്പെടുത്തി.

ഇ.എസ്.എസ്.എസ്. പ്രസിഡന്റ് ഫാ.മാര്‍ട്ടിന്‍ അഴിക്കകത്ത് അദ്ധ്യക്ഷത വഹിച്ച ചടങ്ങില്‍ ഇ.എസ്.എസ്.എസ്. സെക്രട്ടറി ശ്രി.ഡൊമിനിക്.സി.ല്‍, വരാപ്പുഴ അതിരൂപത കെ.എല്‍.എം.പ്രസിഡന്റ് ശ്രി.ബിജു പുത്തന്‍പുരക്കല്‍, വില്ലേജ് ഓര്‍ഗനൈസര്‍ ലൂസി ജേക്കബ് എന്നിവര്‍ ആശംസയര്‍പ്പിച്ച് സംസാരിച്ചു. ശ്രി.ഹൈബി ഈഡന്‍ ങജ ജനപ്രതിനിധികള്‍ക്ക് മെമന്റോയും, പൊന്നാടയും നല്‍കി. ജനപ്രതിനിധികളായ ജില്ല പഞ്ചായത്ത് മെമ്പര്‍ അഡ്വ.യേശുദാസ് പറപ്പിള്ളി, കൊച്ചിന്‍ കോര്‍പ്പറേഷന്‍ കൗണ്‍സിലര്‍ അഡ്വ.മിനിമോള്‍.വി.കെ, വരാപ്പുഴ പഞ്ചായത്ത് പ്രസിഡന്റ് കൊച്ചുറാണി ജോസഫ്, എന്നിവര്‍ മറുപടി പ്രസംഗം നടത്തി. പ്രോഗ്രാം കോഡിനേറ്റര്‍ വിപിന്‍ ജോ എല്ലാവര്‍ക്കും നന്ദിയര്‍പ്പിച്ചു.

ആരോഗ്യ സംരക്ഷണത്തിൽ “Archbishops’ Care(AbC)” എന്ന പേരിൽ വരാപ്പുഴ അതിരൂപതാ അംഗങ്ങൾക്കു മാത്രമായി ചികിത്സാ പദ്ധതി വിഭാവനം ചെയ്തു നടപ്പിലാക്കുകയാണ്.

“Archbishops’ Care(AbC)” പദ്ധതിയിൽ ജനുവരി ഫെബ്രുവരി മാസങ്ങളിൽ അതിരൂപതയിലെ കുടുംബങ്ങളിൽ നിന്നുമുള്ള ഒരു മുതിർന്ന പൗരന് സൗജന്യ മെഡിക്കൽ ചെക്കപ്പ് നല്കുന്നതാണ്. കൂടാതെ കുടുംബത്തിലെ എല്ലാ അംഗങ്ങൾക്കും വിവിധ ചികിത്സാ ചിലവുകളിൽ 25-30 ശതമാനം കിഴിവും നല്കുന്നതാണ്.


“Archbishops’ Care(AbC)” പദ്ധതിയിൽ അംഗങ്ങളാക്കുന്നതിന് പൂർണ്ണമായി പൂരിപ്പിച്ച അപേക്ഷകൾ സൗജന്യ ഹെൽത്ത് ചെക്കപ്പിന് വരുമ്പോൾ ലൂർദിൽ സമർപ്പിക്കേണ്ടതാണ്. വിശദ വിവരങ്ങൾ അപേക്ഷാ ഫോമിൽ ലഭ്യമാണ്.

പൗരോഹിത്യത്തിൻ്റെ കൃപാപൂരിതമായ ചൈതന്യവും സുവിശേഷ ധ്യാനങ്ങളുടെ ആഴവും ജീവിച്ചുകാണിച്ച ശ്രേഷ്ഠ വൈദികരുടെ സംഭാവനകൾ വിവിധ മേഖലകളിലുള്ള കേരള സമൂഹത്തിന്റെ വളർച്ചയെ ത്വരിതപ്പെടുത്തിയിട്ടുണ്ടെന്ന് ആർച്ച്ബിഷപ് ഡോ.ജോസഫ് കളത്തിപ്പറമ്പിൽ പ്രസ്താവിച്ചു.

റവ. ഡോ. വിൻസെൻ്റ് വാരിയത്തിൻ്റെ “പള്ളീലച്ചൻ” എന്ന പുസ്തകത്തിന്റെ പ്രകാശനം നിർവഹിക്കുകയായിരുന്നു ആർച്ച്ബിഷപ്പ്. താൻ പ്രസംഗിക്കുന്നത് ജീവിക്കുക എന്ന് ഫ്രാൻസിസ് പാപ്പ പറയുന്നതുപോലെയാണ് വാരിയത്ത് അച്ചൻ്റെ രീതി. വൈദികർക്കും, സന്യ സ്ത്ർക്കും വൈദികാർഥി കൾക്കും ധ്യാനഗുരു എന്ന നിലയിൽ കേരളത്തിൽ ഉടനീളം വിഖ്യാതനാണ് വിൻസെൻ്റ് അച്ചൻ.

സെമിനാരി പ്രവേശനം വൈദികന്റെ മരണം വരെയുള്ള ജീവിതമാണ് പുസ്തകത്തിന്റെ പ്രമേയം. പെരുമ്പടവം ശ്രീധരന്റെ അവതാരികയുമുണ്ട്.
കെ സി ബി സി ഡപ്യൂട്ടി സെക്രട്ടറി ജനറൽ ഫാ.ജേക്കമ്പ് പാലയ്ക്കപ്പിള്ളി ആദ്യപുസ്തകം ഏറ്റുവാങ്ങി.

വരാപ്പുഴ അതിരൂപത വികാരി ജനറൽമാരായ മോൺ. മാത്യു കല്ലിങ്കൽ, മോൺ. മാത്യു ഇലഞ്ഞിമറ്റം, ചാൻസലർ ഫാ.എബിജിൻ അറക്കൽ, ജെക്കോബി, ഡോ.ജോസ് തളിയത്ത്, ഷാജി ജോർജ് എന്നിവർ പ്രസംഗിച്ചു. പ്രണതാ ബുക്സാണ് പ്രസാധകർ.

ഫ്രാൻസിസ് പാപ്പാ ആഗോള കത്തോലിക്കാ സഭയിൽ യൗസേപ്പിതാവർഷമായി ആചരിക്കാൻ ആഹ്വാനം ചെയ്തതിനെ തുടർന്ന് വരാപ്പുഴ അതിരൂപതയിൽ യൗസേപ്പിതാവർഷത്തിൻറ ഉദ്ഘാടനം ആർച്ച്ബിഷപ്പ് ഡോ. ജോസഫ് കളത്തിപ്പറമ്പിൽ ദിവ്യബലി അർപ്പിച്ചുകൊണ്ട് നിർവഹിച്ചു.

തൃപ്പൂണിത്തുറ സെൻറ് ജോസഫ് ദേവാലയത്തിൽ വച്ചാണ് ചടങ്ങുകൾ നടന്നത്. ഇതിനോടനുബന്ധിച്ച് കൊറോണക്കാലത്ത് തൊഴിൽ നഷ്ടപ്പെട്ടവർക്ക് ആശ്വാസമായി തൊഴിൽ കണ്ടെത്താനുള്ള ആപ്പും ഉദ്ഘാടനം ചെയ്തു. ഈ ആപ്ലിക്കേഷനിലൂടെ തൊഴിലന്വേഷകർക്കും തൊഴിൽദാതാക്കൾക്കും പരസ്പരം ബന്ധപ്പെടാനും സേവനം ലഭ്യമാക്കാനും കഴിയും.

വരാപ്പുഴ അതിരൂപതയുടെ സാമൂഹ്യ സേവന വിഭാഗമായ എറണാകുളം സോഷ്യൽ സർവീസ് സൊസൈറ്റി ആണ് ഇതിൻറെ പ്രവർത്തനങ്ങൾ ഏകോപിപ്പിക്കുന്നത്. തുടർന്ന് ജീവകാരുണ്യ പ്രവർത്തനങ്ങളും ഉദ്ഘാടനം ചെയ്യപ്പെട്ടു.

വികാർ ജനറൽ മോൺസിഞ്ഞോർ മാത്യു കല്ലിങ്കൽ , ഫാ. നെൽസൺ ജോബ് OCD, ജനറൽ കൺവീനർ ഫാ. ആന്റണി അറക്കൽ ,ഫാ. മാർട്ടിൻ അഴിക്കകത്ത്, ഫാ. ജോളി തപ്പലോടത്ത്, ഫാ. ആന്റണി കോച്ചേരി എന്നിവർ സന്നിഹിതരായിരുന്നു. കോവിഡ് പ്രോട്ടോകോൾ പാലിച്ചു കൊണ്ടാണ് ചടങ്ങുകൾ നടന്നത്.

കൊച്ചി: കെ സി ബി സി മാധ്യമ കമ്മീഷൻ ഇദംപ്രഥമമായി ഏർപ്പെടുത്തിയ സോഷ്യൽ മീഡിയ ഐക്കൺ അവാർഡിന് റവ.ഡോ. വിൻസെന്റ് വാരിയത്ത് അവതരിപ്പിക്കുന്ന അനുദിന ആത്മീയ ചിന്തകൾ എന്ന പ്രോഗ്രാം അംഗീകാരം നേടി.സോഷ്യൽ മീഡിയയിലൂടെ നന്മ വിതയ്ക്കുകയും നല്ലതു പറയുകയും ചെയ്യുന്നവരെ പ്രോത്സാഹിപ്പിക്കുക എന്ന ഉദ്ദേശ്യത്തോടു കൂടെയാണ് കെ സി ബി സി അവാർഡ് ഏർപ്പെടുത്തിയത്.

വരാപ്പുഴ അതിരൂപതയിൽ നിന്നുള്ള റവ. ഡോ. വിൻസൻറ് വാരിയത്ത് അഞ്ചു വിഷയങ്ങളിൽ ബിരുദാനന്തര ബിരുദവും (MA ) സൈക്കോളജിയിൽ പി എച്ച് ഡി യും ഉള്ള വൈദികനാണ്. കൊറോണയുടെ നാളുകളിൽ ആളുകൾക്ക് സമാശ്വാസം ഏകാൻ ആരംഭിച്ചതാണ് എല്ലാ ശനിയാഴ്ചയും അപ്‌ലോഡ് ചെയ്യുന്ന അനുദിന ആത്മീയ ചിന്തകൾ.മുപ്പത്തി അഞ്ചു എപ്പിസോഡുകൾ പൂർത്തിയാക്കിയപ്പോൾ ആണ് കെ സി ബി സി യുടെ അംഗീകാരം അച്ചനെ തേടിയെത്തുന്നത്.

ഫിലിപ്പീൻസിലെ മനിലയിൽനിന്ന് ഡോക്ടറേറ്റ് നേടിയ ഫാ. വിൻസെന്റ് മൈനർ സെമിനാരിയുടെ റെക്ടർ ആയും സേവനം അനുഷ്‌ടിച്ചിട്ടുണ്ട്.ജനുവരി എട്ടാം തിയ്യതി കെ സി ബി സി പ്രസിഡന്റ് മാർ ജോർജ് ആലഞ്ചേരിയും മീഡിയ കമ്മീഷൻ അധ്യക്ഷൻ മാർ ജോസഫ് പാംപ്ലാനിയും മുഖ്യാതിഥികളായി പി ഓ സി യിൽ വെച്ച് നടന്ന ചടങ്ങിൽ അവാർഡുകൾ സമ്മാനിച്ചു.

വത്തിക്കാൻ : ജനതകളുടെ സുവിശേഷ വൽക്കരണത്തിനായുള്ള തിരുസംഘത്തിൻറെ ( Congregation for the Evangelization of Peoples) അംഗമായി വരാപ്പുഴ അതിരൂപത മെത്രാപ്പോലീത്ത ഡോ. ജോസഫ് കളത്തിപ്പറമ്പിലിനെ ആഗോള കത്തോലിക്കാ സഭയുടെ അധ്യക്ഷൻ ഫ്രാൻസിസ് പാപ്പാ നിയമിച്ചു . വരുന്ന അഞ്ചു വർഷത്തേക്കാണ് നിയമനം. വത്തിക്കാനിൽ നിന്നുള്ള നിയമന ഉത്തരവ് ഡോ. ജോസഫ് കളത്തിപ്പറമ്പിൽ സ്വീകരിച്ചു.

വരാപ്പുഴ അതിരൂപത മെത്രാപ്പോലീത്തയായി സേവനമനുഷ്ഠിക്കുന്നതോടൊപ്പം
പുതിയ ചുമതല ഏറ്റെടുക്കുന്ന ആർച്ച്ബിഷപ്പ് ജോസഫ് കളത്തിപ്പറമ്പിലിനെ പോപ്പ് ഫ്രാൻസിസ് അഭിനന്ദനങ്ങൾ അറിയിച്ചു. പുതിയ ഉത്തരവാദിത്വം ഏറ്റെടുത്തു ചെയ്യാനുള്ള എല്ലാ ദൈവാനുഗ്രഹങ്ങളും ആശംസിച്ചു.

വരാപ്പുഴ അതിരൂപത മെത്രാപ്പോലീത്തയായി സ്ഥാനം ഏറ്റെടുക്കുന്നതിനു മുൻപ് വത്തിക്കാനിൽ കുടിയേറ്റക്കാർക്കും പ്രവാസികൾക്കും വേണ്ടിയുള്ള പൊന്തിഫിക്കൽ കൗൺസിൽ ( Pontifical Council for Migrants and Itinerant People ) സെക്രട്ടറി ആയി 6 വർഷത്തോളം സ്തുത്യർഹമായി സേവനം അനുഷ്ടിച്ച അദ്ദേഹത്തിന്റെ കർമശേഷിയും അനുഭവ സമ്പത്തും പരിഗണിച്ചാണ് പുതിയ ഉത്തരവാദിത്യം വത്തിക്കാൻ ഏല്പിച്ചിട്ടുള്ളത്.

വരാപ്പുഴ അതിരൂപതയുടെ ശ്രേഷ്ഠ മെത്രാപോലിത്ത ആയിരുന്ന അഭിവന്ദ്യ ഡാനിയേൽ അച്ചാരുപറമ്പിൽ പിതാവിന്റെ ദേഹവിയോഗത്തിന്റെ 10 ആം വാർഷികമായിരുന്നു ഒക്ടോബർ 26 ന് . വരാപ്പുഴ അതിരൂപത നന്ദിയോടെ അദ്ദേഹത്തെ ഓർക്കുന്നു .

നിഷ്കളങ്കമായി പൊട്ടിച്ചിരിക്കുന്ന പിതാവിന്റെ മുഖമാണ് ആദ്യം ഓർമയിൽ വരുക . ആതമീയതയിൽ നിന്നും രൂപം കൊണ്ട നിശ്ചയദാർഢ്യം ആയിരുന്നു അദ്ദേഹത്തിന്റെ കരുത്ത്‌ .14 വർഷങ്ങൾ അദ്ദേഹം വരാപ്പുഴ അതിരൂപതയുടെ ഇടയനായി സേവനം ചെയ്തു .കേരള സഭയുടെ തലവനായും തന്റെ ദൗത്യം നിർവഹിച്ചു .

പണ്ഡിതനും സാത്വകിനും ആയിരുന്നു അദ്ദേഹം . ചിതറിക്കിടന്നിരുന്ന കേരളത്തിലെ ലത്തീൻ ക്രൈസ്തവരെ കെട്ടുറപ്പിലേക്കു കൊണ്ടുവരുന്നതിന് വേണ്ടി കെ .ആർ. എൽ .സി .സി. എന്ന മഹത്തായ സംവിധാനത്തിന് തുടക്കം കുറിച്ചു .ഇത് കേരള ലത്തീൻ സഭയെ കേരളത്തിലെ സാമൂഹിക – രാഷ്ട്രീയ മണ്ഡലങ്ങളിൽ ഇടപെടാൻ പ്രാപ്തമാക്കി .

വൈപ്പിൻ കരയിലെ ജനങ്ങൾക്ക് കുടിവെള്ളം എത്തിക്കാൻ നടപടി സ്വീകരിച്ചില്ലെങ്കിൽ താൻ ഉപവാസം ആരംഭിക്കുമെന്നു അദ്ദേഹം ഉറപ്പിച്ചു പറഞ്ഞപ്പോൾ ആ ദിവസങ്ങളിൽ തന്നെ അതിനു പരിഹാരം ലഭിച്ചു എന്നത് അദ്ദേഹത്തിന്റെ സാമൂഹിക ഇടപെടലിന്റെ ഏറ്റവും നല്ല ഉദാഹരണം ആണ് .

കോരിച്ചൊരിയുന്ന മഴയും വീശിയടിക്കുന്ന കാറ്റും വകവെയ്ക്കാതെ കടൽ ക്ഷോഭത്തിന്റെ നൊമ്പരം പേറുന്ന തീരദേശ വാസികളുടെ കുടിലുകൾക്കുമുന്പിൽ , അവരെ ആശ്വസിപ്പിക്കാൻ മഴക്കോട്ടും പ്ലാസ്റ്റിക് തൊപ്പിയും ധരിച്ചു നിൽക്കുന്ന ഡാനിയേൽ പിതാവിന്റെ മുഖം നമുക്ക് എളുപ്പം മറക്കാൻ കഴിയില്ല .

മൂലമ്പിള്ളി പദ്ധതിക്ക് വേണ്ടി ജനങ്ങളെ കുടിയിറക്കിയപ്പോൾ “എന്റെ മക്കളെ വഴിയാധാരമാക്കരുത് അവർക്കു മാന്യമായി ജീവിക്കാൻ മാർഗം ഉണ്ടാകണം” എന്ന് പറഞ്ഞുകൊണ്ട് അവർക്കു വേണ്ടി ആദ്യം ഉയർന്ന ശബ്ദം അദ്ദേഹത്തിന്റേതായിരുന്നു. അത് അധികാര സ്ഥാനത്തുള്ളവരുടെ കണ്ണ് തുറപ്പിച്ചു .മൂലമ്പിള്ളി പാക്കേജ് പുറത്തു വന്നു. എന്നാൽ ഇന്നും അത് പ്രാവർത്തികമാക്കാതെ സർക്കാരുകൾ ഉരുണ്ടുകളിക്കുന്ന കാഴ്ച ദയനീയമാണ് .

വരാപ്പുഴ അതിരൂപതയുടെ വിദ്യാഭ്യാസ വളർച്ചയുടെ നാഴിക ക്കല്ലായ ‘ നവദർശൻ ‘ തുടങ്ങിയത് അദ്ദേഹത്തിന്റെ കാലത്താണ് . ഇത് മറ്റുപലരും മാതൃകയാക്കുകയും ഏറ്റെടുക്കുകയും ചെയ്തു

എത്ര നാൾ ജീവിച്ചു എന്നതിലല്ല ,എങ്ങനെ ജീവിച്ചു എന്നതിലാണ് ജീവിതത്തിന്റെ മഹത്വം എന്ന് അദ്ദേഹം സ്വന്തം ജീവിതം കൊണ്ട് തെളിയിച്ചു. പവിത്രമായ ആ ഓർമകൾക്ക് മുൻപിൽ ഒരായിരം ആദരാഞ്ജലികള്‍ സ്നേഹപൂർവ്വം അർപ്പിക്കുന്നു.

മാർത്തോമാ സഭാ തലവൻ ഡോ. ജോസഫ് മാർത്തോമാ മെത്രാപോലിത്ത മാനുഷിക മൂല്യങ്ങൾ മുറുകെ പിടിച്ച വലിയ ഇടയൻ ആയിരുന്നു എന്ന് വരാപ്പുഴ അതിരൂപത ആർച്ച്ബിഷപ് ഡോ. ജോസഫ് കളത്തിപ്പറമ്പിൽ അനുസ്മരിച്ചു . ഡോ. ജോസഫ് മാർത്തോമാ മെത്രാപോലിത്തയുടെ നിര്യാണത്തിൽ അനുശോചനം അറിയിച്ചു സംസാരിക്കുകയായിരുന്നു അദ്ദേഹം .

തന്റെ ജീവിതകാലഘട്ടത്തിൽ പാവപ്പെട്ടവരോടും ദളിതരോടും പക്ഷം ചേരുകയും അവരുടെ ഉന്നമനത്തിനായി അദ്ദേഹം പ്രവർത്തിക്കുകയും ചെയ്തു . ആത്മീയവും, സാമൂഹികവും,സാംസ്കാരികവുമായ മേഖലകളിൽ അദ്ദേഹം തന്റെ വ്യക്തി മുദ്ര പതിപ്പിച്ചു .

മാനവരാശിയുടെ നിലനിൽപ്പിനു തന്നെ ഭീഷണിയാകുന്ന പ്രകൃതിയെയും ആവാസവ്യവസ്ഥകളെയും നശിപ്പിക്കുന്ന മനുഷ്യന്റെ സ്വാർത്ഥമായ പ്രവർത്തനങ്ങളെ അദ്ദേഹം എന്നും നിശിതമായി വിമർശിച്ചു. തനിക്കു ശരിയെന്നു തോന്നുന്ന കാര്യങ്ങൾക്കു വേണ്ടി മുന്നിട്ടിറങ്ങാനും അത് നടപ്പിലാകുന്നതുവരെ അക്ഷീണം പ്രയത്നിക്കാനും അദ്ദേഹം ഒരിക്കലും മടികാണിച്ചില്ല .

നീണ്ട 13 വർഷക്കാലം മാർത്തോമാ സഭയെ മുന്നിൽനിന്നു നയിച്ച അദ്ദേഹം നിലപാടുകളിൽ ഒരിക്കലും വെള്ളം ചേർക്കാത്ത വ്യക്തിത്വത്തിന് ഉടമയായിരുന്നു എന്ന് ആർച്ച്ബിഷപ് പറഞ്ഞു

വരാപ്പുഴ അതിരൂപത വൈദികനായിരുന്ന ഫാ. ജോർജ് വേട്ടാപ്പറമ്പിൽ തൻറെ നീണ്ട വർഷത്തെ വൈദിക ജീവിത സേവനത്തിനുശേഷം ദൈവസന്നിധിയിലേക്ക് യാത്രയായി.

ചേരാനല്ലൂരിൽ പൈലിയുടെയും മേരിയുടെയും മകനായി1937 ലാണ് അദ്ദേഹം ജനിച്ചത്.1965 മാർച്ച് 14 ന് വരാപ്പുഴ അതിരൂപത ആർച്ച്ബിഷപ്പ് ദൈവദാസൻ ജോസഫ് അട്ടിപ്പേറ്റി പിതാവിൽ നിന്നും വൈദീകപട്ടം സ്വീകരിച്ചു.

തുടർന്ന് കുരിശിങ്കൽ,പാലാരിവട്ടം, മൂലമ്പിള്ളി, നെട്ടൂർ, വടുതല, കറുത്തേടം, വല്ലാർപാടം, തേവര, ഇളംകുളം, തോമസ്പുരം,ചിറ്റൂർ, വള്ളുവള്ളി, വെണ്ടുരുത്തി എന്നീ ഇടവകകളിലായി വരാപ്പുഴ അതിരൂപതയിൽ തൻറെ സേവനകാലം ഭംഗിയായി പൂർത്തിയാക്കി.

തൻറെ ജീവിതകാലം മുഴുവൻ അതിരൂപതക്കും നാടിനും അദ്ദേഹം നൽകിയ സേവനങ്ങൾ വിലമതിക്കാനാവാത്തതാണ് എന്ന് വരാപ്പുഴ അതിരൂപത ആർച്ച്ബിഷപ്പ് ഡോ. ജോസഫ് കളത്തിപ്പറമ്പിൽ പിതാവ് അഭിപ്രായപ്പെട്ടു. 2012 മുതൽ കാക്കനാട്ആവിലഭവനിൽ വിശ്രമ ജീവിതത്തിലായിരുന്നു അദ്ദേഹം . അദ്ദേഹത്തിൻറെ വിയോഗം വരാപ്പുഴ അതിരൂപതയ്ക്ക് നികത്താനാവാത്ത നഷ്ടമാണ്. അദ്ദേഹത്തിൻറെ ആത്മാവിന് വേണ്ടി നമുക്ക് പ്രാർത്ഥിക്കാം.