ജീവിതത്തിലെ വെല്ലുവിളികളും പ്രതിസന്ധികളും സസന്തോഷം തരണം ചെയ്യുന്നതിന് പരിശുദ്ധ മാതാവിനോടുള്ള ഭക്തിയും വിശ്വാസവും കാത്തു സൂക്ഷിക്കണമെന്ന് വരാപ്പുഴ ആർച്ച് ബിഷപ്പ് ഡോ.ജോസഫ് കളത്തിപ്പറമ്പിൽ വിശ്വാസികളെ ആഹ്വാനം ചെയ്തു.
19-ാ മത് വല്ലാർപാടം മരിയൻ തീർത്ഥാടനത്തോടനുബന്ധിച്ചുള്ള സമൂഹബലിയിൽ മുഖ്യ കാർമ്മികത്വം വഹിച്ച് സംസാരിക്കുകയായിരുന്നു അദ്ദേഹം. ദേശീയ മരിയന്‍ തീര്‍ത്ഥാടന കേന്ദ്രമായ വല്ലാര്‍പാടം ബസിലിക്കയിലേക്കുള്ള 19- മത് മരിയന്‍ തീർത്ഥാടനത്തിലും പൊന്തിഫിക്കൽ ദിവ്യബലിയിലും ആയിരങ്ങൾ പങ്കെടുത്തു. വല്ലാര്‍പാടം തിരുനാളിന് ഉയര്‍ത്താനുള്ള ആശീര്‍വദിച്ച പതാകയേന്തി കിഴക്കന്‍ മേഖലയില്‍ നിന്നും ആരംഭിച്ച തീര്‍ത്ഥാടനത്തിന്റെ ഉദ്ഘാടനം എറണാകുളം സെന്റ് ഫ്രാന്‍സിസ് അസ്സീസി കത്തീഡ്രല്‍ അങ്കണത്തില്‍ അതിരൂപത വികാരി ജനറൽ മോൺ.മാത്യു കല്ലിങ്കൽ നിര്‍വഹിച്ചു.
പടിഞ്ഞാറന്‍ മേഖലയില്‍ നിന്നുമുള്ള ദീപശിഖാപ്രയാണം വൈപ്പിന്‍ വല്ലാര്‍പാടം ജംഗ്ഷനില്‍ നിന്ന് വരാപ്പുഴ അതിരൂപത വികാര്‍ ജനറല്‍ മോണ്‍. മാത്യു ഇലഞ്ഞിമിറ്റം ഉദ്ഘാടനം ചെയ്തു.
ഗോശ്രീ പാലങ്ങളിലൂടെ വല്ലാര്‍പാടത്തിന്റെ ഇരുവശങ്ങളില്‍ നിന്നും എത്തുന്ന നാനാജാതി മതസ്ഥരായ തീർത്ഥാടകർ തുടർന്ന് നടന്ന പൊന്തിഫിക്കൽ ദിവ്യബലിയിൽ പങ്കെടുത്തു.
അതിരൂപതയിലെ എല്ലാ വൈദികരും സന്യസ്തരും പങ്കാളികളായി. ഫാ. ഡോ.മാര്‍ട്ടിന്‍ എന്‍. ആന്റണി വചന സന്ദേശം നല്‍കി. തുടര്‍ന്ന് വിശ്വാസികളെ ആര്‍ച്ച്ബിഷപ്പ് വല്ലാര്‍പാടത്തമ്മയ്ക്ക് അടിമ സമര്‍പ്പിച്ചു.

സെപ്റ്റംബര്‍ 11 മുതല്‍ 15 വരെ ഫാ.എബ്രഹാം കടിയകുഴിയും ബ്രദര്‍ സാബു ആറുതൊട്ടിയിലും നയിക്കുന്ന വല്ലാര്‍പാടം ബൈബിള്‍ കണ്‍വെന്‍ഷന്‍ വൈകീട്ട് 4. 30 മുതല്‍ 9 വരെ ഉണ്ടായിരിക്കുന്നതാണ്. പരിശുദ്ധ വല്ലാര്‍പാടത്തമ്മയുടെ തിരുനാള്‍ സെപ്റ്റംബര്‍ 16 മുതല്‍ 24 വരെയും നടക്കും .എട്ടാമിടം ഒക്ടോബര്‍ 1 ന്.

വരാപ്പുഴ അതിരൂപത ആചരിക്കുന്ന കുടുംബവിശുദ്ധീകരണ വർഷം പ്രമാണിച്ച് ഫാമിലി കമ്മീഷൻ നടത്തിയ ഗ്രാൻഡ്‌പേരെന്റ്സ് ഡേ സെലിബ്രേഷൻ ആർച്ച്ബിഷപ്പ് ഡോ. ജോസഫ് കളത്തിപ്പറമ്പിൽ ഉദ്ഘാടനം ചെയ്തു. മാതാപിതാക്കൾ തങ്ങളുടെ ജീവിതത്തിൽ, പ്രത്യേകിച്ച് വാർദ്ധക്യത്തിൽ ദൈവത്തെ മുറുകെപ്പിടിച്ച് പ്രാർത്ഥനയുടെ ബലത്തിൽ ജീവിക്കുന്നവരാവണമെന്ന് ആർച്ച്ബിഷപ്പ് ഉദ്ബോധിപ്പിച്ചു.
തുടർന്ന് കെസിബിസി പ്രോലൈഫ് സമിതി അംഗം ശ്രീ. ജോയ്‌സ് മുക്കുടം ക്ലാസ് നയിച്ച്. ഫാമിലി കമ്മീഷൻ ഡയറക്ടർ റവ. ഫാദർ പോൾസൺ സിമേതി അധ്യക്ഷത വഹിച്ചു. സിസ്റ്റർ ജോസ്ഫിന, ശ്രീ ജോൺസൻ പള്ളത്തുശ്ശേരി, ശ്രീ ആന്റണി നിക്സൺ, ശ്രീ ബെന്നി അറക്കൽ തുടങ്ങിയവർ സന്നിഹിതരായിരുന്നു. 1800 അംഗങ്ങൾ സംഗമത്തിൽ പങ്കെടുത്തു.

ജീവിതത്തിൻറെ എല്ലാ കാലത്തും നന്മയുടെ നാളിലും ദുഃഖത്തിന്റെ വേളയിലും എപ്പോഴും ദൈവം നമ്മുടെ ജീവിതത്തിൽ നമ്മോട് ചേർന്ന് ഉണ്ടെന്ന് ആർച്ച് ബിഷപ്പ് ജോസഫ് കളത്തിപ്പറമ്പിൽ പിതാവ് അഭിപ്രായപ്പെട്ടു. വരാപ്പുഴ അതിരൂപത ഫാമിലി യൂണിറ്റ് ഡയറക്ടറേറ്റിന്റെ നേതൃത്വത്തിൽ സംഘടിപ്പിക്കപ്പെട്ട കുടുംബയൂണിറ്റ് കേന്ദ്ര സമിതി ഭാരവാഹികളുടെ ദ്വൈവാർഷിക യോഗമായ സിംഫോണിയ 2023 ഉദ്ഘാടനം ചെയ്തു സംസാരിക്കുകയായിരുന്നു അഭിവന്ദ്യ ആർച്ച്ബിഷപ്പ്. സമൂഹത്തിൽ ഇന്ന് നടമാടുന്ന എല്ലാ തിന്മ പ്രവർത്തനങ്ങളെയും നേരിടാൻ സ്വയം സജ്ജമാകണമെന്ന് യുവജനങ്ങളെ ശ്രീ ടി ജെ വിനോദ് എംഎൽഎ തൻറെ മുഖമുഖ്യ പ്രഭാഷണത്തിലൂടെ ഓർമ്മപ്പെടുത്തി. ശ്രീ ഷാജി ജോർജ് മുഖ്യ സന്ദേശം നൽകി. വരാപ്പുഴ അതിരൂപത ബിസിസി സംഘടിപ്പിച്ച അഖില കേരള ചരിത്ര ക്വിസ് ജേതാക്കൾക്ക് ആർച്ച് ബിഷപ്പ് പുരസ്കാരങ്ങൾ നൽകി. അതിരൂപതയിലെ എല്ലാ കുടുംബ യൂണിറ്റുകളിലും കഴിഞ്ഞ ഒരു വർഷക്കാലം പൂർണമായും സംബന്ധിച്ച യുവജനങ്ങൾക്ക് അഭിവന്ദ്യ ആർച്ച് ബിഷപ്പ് പ്രത്യേക പുരസ്കാരങ്ങൾ സമ്മാനിച്ചു. ബാസ്കിൽ തോമസ്, സേവിയർ, മാനുവൽ പൊടുത്തോർ, ബൈജു, ജോൺസൺ, ജെയിംസ് ജോൺ, ബിജു, ജോബി തോമസ് എന്നിവർ നേതൃത്വം നൽകി. സിംഫോണിയ 2023 ൽ വരാപ്പുഴ അതിരൂപതയിലെ എല്ലാ ഇടവകകളിൽ നിന്നുള്ള അനേകം യുവജനങ്ങൾ സംബന്ധിച്ചു.

നാമകരണനടപടികൾക്ക് തുടക്കമായി

2023 ജൂലൈ 19, ബുധൻ, വൈകിട്ട് 4ന് മോൺ.ഇമ്മാനുവൽ ലോപ്പസിന്റെ ദൈവദാസപ്രഖ്യാപന ചടങ്ങുകൾക്ക് തുടക്കം കുറിച്ചുകൊണ്ട് വരാപ്പുഴ അതിരൂപത മെത്രാസന മന്ദിരത്തിൽ നിന്നും വരാപ്പുഴ മെത്രാപ്പോലീത്ത ഡോ. ജോസഫ് കളത്തിപ്പറമ്പിൽ ദീപശിഖ ചാത്യാത്ത് പള്ളി വികാരിക്ക് നൽകി. തുടർന്ന് ദീപശിഖാ പ്രയാണം ആരംഭിച്ചു. എറണാകുളം ഇൻഫന്റ് ജീസസ് പള്ളിയിൽ നിന്നും മോൺ. ഇമ്മാനുവൽ ലോപ്പസിന്റെ ഛായാചിത്ര പ്രയാണവും ഇതിനോട് കൂടിച്ചേർന്നു. എറണാകുളം ക്യുൻസ് വാക്ക് വേയിൽ വച്ച് ചാത്യാത് ഇടവകാംഗങ്ങൾ പ്രയാണങ്ങളെ സ്വീകരിച്ചു. തുടർന്ന് മോൺ. ഇമ്മാനുവൽ ലോപ്പസിന്റെ മാതൃ ദേവാലയമായ ചാത്യാത് മൗണ്ട് കാർമൽ ദേവാലയങ്കണത്തിൽ വച്ച് വരാപ്പുഴ അതിരൂപത വികാർ ജനറൽമാർ ദീപശിഖയും ഛായാചിത്രവും സ്വീകരിച്ചു.

തുടർന്ന് നടത്തപ്പെട്ട പരിശുദ്ധ ദിവ്യബലിയിൽ വരാപ്പുഴ അതിരൂപത മെത്രാപ്പോലീത്ത ഡോ. ജോസഫ് കളത്തിപ്പറമ്പിൽ മുഖ്യ കാർമ്മികനായി. കണ്ണൂർ രൂപതാ മെത്രാൻ ഡോ.അലക്സ് വടക്കുംതല സുവിശേഷ പ്രഘോഷണം നടത്തി. കോട്ടപ്പുറം മുൻ മെത്രാൻ ഡോ.ജോസഫ് കരിക്കാശ്ശേരി, ആർച്ചുബിഷപ്പ് എമിരിറ്റസ് ഡോ. ഫ്രാൻസിസ് കല്ലറക്കൽ, നെയ്യാറ്റിൻകര മെത്രാൻ ഡോ.വിൻസന്റ് സാമുവൽ എന്നിവർ സഹകാർമികരായി. ദിവ്യബലിയുടെ മദ്ധ്യേ മോൺ. ഇമ്മാനുവൽ ലോപ്പസിനെ ദൈവദാസ പദവിയിലേക്ക് ഉയർത്തികൊണ്ടുള്ള പേപ്പൽ അനുമതി ലത്തീനിൽ വരാപ്പുഴ അതിരൂപത ചാൻസലർ ഫാ.എബിജിൻ അറക്കൽ വായിച്ചു. തുടർന്ന് വരാപ്പുഴ മെത്രാപ്പോലീത്ത അഭിവന്ദ്യ ഡോ.ജോസഫ് കളത്തിപ്പറമ്പിൽ അദ്ദേഹത്തെ ദൈവദാസനായി പ്രഖ്യാപിച്ചു. ദിവ്യബലിയെ തുടർന്ന് മോൺ. ഇമ്മാനുവൽ ലോപ്പസിനെക്കുറിച്ച് ശ്രീ. ഇഗ്‌നേഷ്യസ് ഗോൻസാൽവസ് എഴുതിയ ജീവചരിത്ര ഗ്രന്ഥം ജസ്റ്റിസ് സുനിൽ തോമസിന് നൽകികൊണ്ട് ആർച്ചുബിഷപ്പ് പ്രകാശനം നടത്തി. എറണാകുളം സി.എ.സി. യുടെ നേതൃത്വത്തിൽ തയ്യാറാക്കിയ കാസെറ്റ് പ്രകാശനവും നടത്തപ്പെട്ടു. തുടർന്ന് സിമിത്തേരിയിൽ വച്ച് മോൺ. ഇമ്മാനുവൽ ലോപ്പസിനെ വിശുദ്ധ പദവിയിലേക്ക് ഉയർത്താനുള്ള നാമകരണ പ്രാർത്ഥനയ്ക്ക് ആർച്ച്ബിഷപ്പ് ഡോ. ജോസഫ് കളത്തിപ്പറമ്പിൽ നേതൃത്വം നൽകി. തുടർന്ന് മോൺസിഞ്ഞോറിന്റെ സ്‌മൃതിമണ്ഡപത്തിൽ നെയ്യാറ്റിൻകര മെത്രാൻ ഡോ.വിൻസന്റ് സാമുവൽ പുഷ്‌പാർച്ചന നടത്തി. തുടർന്ന് സിമിത്തേരിയിൽ പൊതു ജനങ്ങൾക്ക് പ്രവേശനം നൽകി. വരാപ്പുഴ അതിരൂപതയുടെ വിവിധ ഇടവകകളിൽ നിന്നുള്ള ആയിരങ്ങൾ ദൈവദാസതിരു കർമ്മങ്ങളിൽ സംബന്ധിച്ചു.

വരാപ്പുഴ അതിരൂപത യുവജന കമ്മീഷൻ സംഘടിപ്പിച്ച “ഇലുമിനൈറ്റ് “യുവജന കുടുംബ സംഗമം എറണാകുളം സെൻറ് ആൽബർട്ട്സ് കോളേജ് ഹാളിൽ ആർച്ച്ബിഷപ്പ് ഉദ്ഘാടനം ചെയ്തു. മണിപ്പൂർ കലാപത്തിൽ ദുരിതമനുഭവിക്കുന്നവർക്ക് ഐക്യദാർഢ്യം പ്രഖ്യാപിച്ചുകൊണ്ട് മെഴുകുതിരികൾ തെളിച്ചു.

ഇടവകകൾ തോറും യുവജനങ്ങൾ ഒരുമിച്ച് ചേരുന്ന YUV,”യുവജന കൂട്ടായ്മയുടെ ഉദ്ഘാടനവും, ഇലുമിനൈറ്റ്- ഫൊറോന തല സമ്മേളനങ്ങളുടെ ഉദ്ഘാടനവും സമ്മേളനത്തിൽ നിർവഹിക്കപ്പെട്ടു. കെസിവൈഎം ജീസസ് യൂത്ത് സി എൽ സി സംഘടനകളിലെ കലാകാരന്മാർ അവതരിപ്പിച്ച കലാപരിപാടികളും, ഇലുമിനിറ്റ് മ്യൂസിക് ബാൻ്റും സമ്മേളനത്തിൽ അവതരിപ്പിക്കപ്പെട്ടു.

പ്രമുഖ കലാസംവിധായകൻ ജോസഫ് നെല്ലിക്കൻ യുവജനങ്ങളുമായി സംവദിച്ചു. ശ്രീമതി പൗളിവത്സൻ, ഫാ. ജിജു അറക്കത്തറ (കെ ആർ എൽ സി ബി സി യൂത്ത് കമ്മീഷൻ സെക്രട്ടറി), അഡ്വക്കേറ്റ് ഷെറി ജെ തോമസ്, (കെഎൽസിഎ സംസ്ഥാന പ്രസിഡൻറ്), ഫാ.യേശുദാസ് പഴമ്പിള്ളി(ബിസിസി ഡയറക്ടർ), ഫാ.ജിജു തീയ്യാടി, (യുവജനകമ്മീഷൻ ഡയറക്ടർ), സോനാല്‍ സ്റ്റീവൻസൺ (കെസിവൈഎം വൈസ് പ്രസിഡൻറ്) തോബിയാസ് കോർണേലി (സി എൽ സി പ്രസിഡൻറ്) ബോഡ്റിൻ (ജീസസ് യൂത്ത് കോഡിനേറ്റർ) അഡ്വ.റോഷൻ റോബിൻ (കോഡിനേറ്റർ,യുവജന കമ്മീഷൻ), സിബിൻ യേശുദാസൻ ജോ. (സെക്രട്ടറി യുവജന കമ്മീഷൻ),നീതു ഫ്രാൻസിസ് എന്നിവർ സംസാരിച്ചു.